這幾個月來，阿媽重複出現的嗯嗯聲，使得在寧靜的環境，分隔的房間，仍然時不時凝住凝住聽到聲音。
最近，嗯嗯聲消失了。
但別開心得太早啦。
取而代之，是不斷寫字的手。而又看不出寫在紙上的字，是在寫什麼。一旦手指頭轉動著就停不了。問：要不要去散步，唔去；要不要去廁所，唔去；要不要出飯廳吃飯，唔食。不知道她在怎麼樣的時空遛達著。
那時還心想，寫字總比比嗯嗯聲好。
開始寫字後兩星期，阿媽開始話工人姐姐打佢，仲要講到喊，情緒一發不可收拾，趕工人姐姐走。阿媽一見到工人，就用激動又兇惡的語氣，指責工人姐姐打佢打到佢咁傷。無限重複。話工人打佢、喊、大聲兇工人連工人令水畀佢飲，都話工人喺杯水落毒。真係得啖笑。拒絕工人任何照顧，唔去廁所、唔換片、唔落床、唔飲水、唔食飯。
工人好無奈、好委屈、好唔開心。我明。我諗都係分開佢哋比較好。咁好啦，我搞埋BB啲嘢就叫隊友幫手睇住BB。啲嘢我做返。
我問阿媽打邊度，佢話全身，但咩傷痕都冇。重要嘅係，屋企有閉路電視，同埋我相信工人姐姐為人，唔會咁做。
原來前一晚，阿媽冇瞓覺。當務之急，就係要諗方法令佢冷靜下來，聽歌、睇片、傾計，無用。自從果晚，開始日夜癲倒。
平日隊友返工，我照顧唔到阿媽同BB兩個，阿媽都係畀返工人姐姐照顧。以為阿媽會唔記得發生咩事，又係新嘅一天。
一天中午，如常午餐。我餵緊BB食飯，工人餵緊阿媽食飯，突然我媽撩交打，話工人打佢、打到佢傷曬。我無出聲，因為我唔相信工人咁做。佢就話，我唔幫佢。仲叫大大聲叫工人：「係你打我！你打我啦！」裝胸作勢有埋拳頭。工人忍左咁耐情緒爆炸，工人話如果有打阿媽，我媽仲坐到喺度？拳頭在手也想還擊，最後忍住。
BB見到曬成個衝突，唔識反應，疑惑又帶點驚望住我，想喊又喊唔出。雖然BB細，聽唔明大人講咩，但識睇人表情，感覺到發生咩事。其實之前隊友一直都覺得我媽啲「行為」會影響到BB，但我覺得適當分開佢哋就無問題，而且當BB大個少少，我可以同BB解釋返，因為婆婆有病，所以咁咁咁咁⋯⋯希望BB大個識體諒，培養BB有同理心，長幼共融云云。
一切我諗得太天真，低估左照顧認知障礙症長者嘅波濤洶湧，以為接阿媽返屋企果陣情緒穩定就可以維持下去，殊不知病程進展得如此快。年初疫情開始，一直想盡辦法大事化小。但始終日間中心暫停，也減少外出，缺乏腦部刺激和社交活動影響很大，我們也少了喘息的空間。
那刻當BB見證衝突，處理唔到情緒⋯⋯ 若到時晚期可能嚴重滋擾時⋯⋯我諗返隊友講嘅嘢係岩嘅，我媽的滋擾行為所帶來的情緒風暴係會影響到每一個人。當成年的照顧者也有機會因滋擾行為而患抑鬱，咁小朋友呢⋯⋯？ 只係我一直都好想兩者共存，好貪心。
現在，身份不再是女兒，還是母親。或者係時候要學習接受不完美、學習放手。
#認知障礙症的居家生活 #sor太多野我講到1999 #在家安老談何容易 #住院舍 #行為問題怎處理 #綁住曬啲認障老人 #無綁又談何容易 #叫我如何放心放手 #我只想老人家最後一程做返個人 #人生在變 #學習接受不完美 #學習放手
IG/ FB: dememtiamam
