上文＜在家照顧抑或留在院舍照顧較好？＞提到當我媽出現行為問題令人無計可施。基本上遇著佢情緒差／分唔清時空、情景而大吵大鬧，就等於精神受左一輪轟炸，大家都辛苦。上網搵既資料都算齊全但比較概括，都係果啲方法，例如轉移話題、聆聽唔爭辯、安撫等等，但實戰唔係幾 work。
有關照顧認知障礙者既書，以台灣出版的比較practical，對長者照顧提出比較人性化的照顧方法。其中日本竹內出左本《失智症照顧指南》，提出根據患者的行為特徵而作相應的照顧，達到「零約束、零臥床、零尿布」，在日本的院舍試行擺脫尿片行動。
睇到覺得好厲害。
我懷疑在香港院舍的可行程度，我媽住的院舍有一個行得走得的阿婆，走失左之後被綁手綁腳。香港院舍人手少睇唔到咁多，安全大曬令老人家連行路既自由都無埋。而我媽行得未夠叻，係院舍無資格行路的，成日一係綁在床上，一係綁在大班椅，安全至上嘛，要完全「零約束、零臥床、零尿布」睇怕得富豪院舍或者自己屋企先做到。
咁講下竹內既理論，重點係6大行為特徵（呢度唔多講）。
好多失智患者都係因為水份不足，出現意識障礙，別忘記人體七成由水份組成；
運動少冇胃口就唔想食野，整整下搞到營養不良，渾身無力疲倦，惡性循環活動能力更低。缺水、無食夠飯，無力痾唔到屎，就會引起異常行為：在早上好安靜，下午開始變得躁動不安，晚上好激動。點解？一旦便秘，大腸為左排便異常興奮，刺激自律神經異常造成情緒不安定。相反，痾左屎就身心舒暢，一天都光曬。
點做好？好簡單，就係：
好好飲水、好好食飯、好好痾屎，簡單但要做到唔容易。
的確，我媽中風之後，吞嚥能力差左好多，飲水食飯咁基本既野都變得好困難做到。無屋企人要佢飲湯飲水，基本上一日一杯水都飲唔到。院舍啲飯菜難食更加唔想吞，身體暴瘦成日病。怎麼辦？於是，帶佢去言語治療重新學吞野、約見營養師開多罐奶粉、請個鐘點姐姐日日餵佢飲湯飲水、落街散步、去廁所痾屎。而家唔穩定既日子少左好多了。
