我媽間房黎左個新婆婆，都係中風後入院舍的，啱啱嚟冇咩嘢，但嚟左一段時間之後，佢開始發脾氣、爬床，於是佢身上著多左一件安全衣，綁在床上、綁緊在輪椅上。每天掙扎，佢嘅情緒變得越來越暴躁，鬧人、扯護理員頭髮，甚至連屋企人都打，其實入面包含左好多情緒紓解唔到。婆婆脾氣大，扯過護理員頭髮之後，護理員對婆婆有戒心，言語之間總是覺得婆婆好麻煩，不太情願接觸婆婆做護理。其實婆婆點會聽唔明，佢開始唔食野。每一晚放工時間都會見到婆婆屋企人嚟探佢，雖然屋企人對住婆婆打不還手、鬧不還口，算好有耐性，但屋企人好頭痛，唔知點算，佢地話婆婆病之前都唔係咁，唔會打人唔會鬧人，而家性情大變。
走過嘅路如此相似。
於是我叫婆婆屋企人搵下婆婆咩原因咁嬲，搵到原因有助紓緩情緒。可能唔習慣院舍生活？可能唔中意俾野綁住？可能身體唔舒服？佢地有可能表達能力低左，有的感覺唔識講出黎，就不斷發脾氣（按此參考處理認知障礙症暴力行為小貼士）同時，如果婆婆情況持續，就要在覆診時要同醫生講返，而覆診最好由屋企人親自帶，因為陪診員只係負責帶婆婆睇醫生，唔係好清楚婆婆嘅情況，所以想婆婆在短短幾分鐘嘅覆診有準確診斷，屋企人一定要在場。同時，亦可以帶婆婆做認知障礙症檢測，報告有助醫生評估個案。後來，婆婆被轉介到老人精神科，而穩定情緒過程也曾經反反覆覆，開始時情緒比往日更差，但經過幾次藥物調整後，終於有改善，婆婆同護理員嘅關係亦有所緩和。
認知障礙症伴隨患者有行為及情緒問題，好普遍，而如果患者情緒極度不穩定、出現暴力行為（包括言語暴力）、有猜疑幻覺，而且頻繁出現，好大機會需要以藥物治療控制。經驗係服藥之後，發脾氣嘅情況會改善，變得平靜一點，但有時候情緒亦有可能被壓得好低，變得面無表情、唔中意講嘢，有機會好似從一個極端走到另一個極端，藥物亦有可能出現副作用，屋企人要留意患者情緒和表現，紀錄下來，方便醫生作出調整，如果緊急有需要就打電話提早覆診期。
認知障礙症情緒極度不穩定、出現暴力行為唔單止在院舍發生，住屋企亦有機會發生，患者嘅用語言攻擊屋企人、鬧人、打人會令同住嘅屋企人好灰、知點做，試諗下：患者嘈成晚，大家都無覺好瞓，而屋企人第二日仲要返工，返到無精神，放工返到屋企又要面對患者言語或身體暴力，咁大壓力就會萌生送患者去院舍住嘅念頭，「送佢去院舍住，無謂大家都辛苦」，亦係好普遍好正常嘅想法。但如果屋企人可以保持冷靜，改變溝通方式，了解患者咩原因咁嬲，紓緩到情況，生活質素就可以大大改善。如果唔處理好個問題，其實去到邊都一樣，唔好諗住「送佢去院舍住」問題就會少左啊！有問題要請教返醫生先係最好嘅方法。
一齊增進說話技巧啦！今次睇呢條片重點係睇佢地點樣溝通，我地由1:16秒睇起，當患者好嬲，睇佢係點樣紓解患者情緒，去片！
睇完。講句唔關事既，做人新抱甚艱難啊！XD
好，返返黎。偌然情緒漸漸得到改善，就可以調整生活節奏，並開始非藥物治療，長遠減少患者對藥物嘅依賴。食咁多藥始終唔好。首先係調整生活作息：重點好好飲水、好好食飯、好好痾屎，按此參考。其次係用非藥物治療形式改善情緒、認知。
