每日玩遊戲係好重要嘅認知訓練
阿媽每天返日間中心都會做運動同玩遊戲。唔好睇少玩遊戲，每日玩遊戲係好重要嘅認知訓練，可以鍛煉集中力、記憶力和解決問題的能力，日日玩仲可以改善思維，人都醒目啲。
傳統嘅訓練媒介有紙和筆、桌面遊戲或電腦程式等等。上圖介紹的分銀仔遊戲，就係一個十分簡易嘅桌面遊戲。各大機構亦印刷左不同的紙牌、遊戲，方便大家買黎玩。例如：腦玩童俱樂部、東華「智晴寶」認知障礙症訓練教材套
而我今篇文章主想介紹幾個在家用 I-pad 可以做到的認知訓練！（本文統粹分享心得，不代表專業）下文主要介紹由 IOS App Store下載的遊戲，用緊android嘅朋友可試下去google play搵下有冇類似嘅應用程式。
六藝智趣
第一次接觸用平板電腦玩認知遊戲就係「六藝智趣」呢個App，由香港認知障礙症協會開發。遊戲設計好local，有麻雀、用港幣數錢計數等等，有不同難度可以選擇。不過遊戲題目唔多，好快就玩曬。但自從我部 I-pad 系統更新左，就再用唔到呢個app了。此app未能支援搭載 iOS 11 或以上版本的裝置。
腦退化一按知
又一本地app，由賽馬會耆智園開發，入面有「健腦遊戲」可以玩。就遊戲黎講，有考記憶力遊戲、拼圖、邏輯推理、心算，個遊戲幾有心思，幾富挑戰性，可以自設難度。
同樣除了遊戲，有介紹認知障礙症嘅知識、搵幫手有咩社區資源、自我評估等等，算係一個大包圍嘅App，資源幾方便可以搵到。不過，用 I-pad界面會少少細。
MagicsterApp
返老還童，細路仔玩嘅遊戲例如拼圖、配對、填色、好適合畀認知障礙嘅老人家玩。MagisterApp是一個兒童遊戲的開發者，其下有很多不同主題、不同挑戰的遊戲。I Pad只要夠空間，可以下載幾個不同的遊戲，免費下載的，但如果想係個app入面玩多幾關，就要畀錢買。只要在App Store搜尋MagicsterApp，就會找到這個開發者設計嘅不同遊戲。
MagicsterApp還有很多不同的遊戲，呢度就不逐一舉例了。大家可以自己發掘一下。
舒爾特方格
呢個app本身用黎訓練專注力和快速閱讀，有唔同的難度可以揀，2X2去到10X10方格，方格可以選擇不同嘅配色，用黎畀我阿媽玩就可以練下反應、速度、注意力、數數字的能力。尤其是數數字，係一個好好嘅訓練。
Sago Mini 遊戲世界
Sago Mini 一個app入面有三十幾款遊戲，遊戲種類繁多，有解難遊戲、情境遊戲、探索遊戲、創意遊戲、音樂遊戲，色彩繽紛，配上音樂聲效，十分吸引。
遊戲的主題亦十分生活化，例如探訪朋友的家，有不同的活動一齊做；學習不同的使用工具；開車到城市、樹林遊覽；坐潛艇到深海看魚、坐火箭去太空探索；到咖啡室坐一坐，又或者了解一下動物園有什麼動物、機場有什麼設施和人，又或者到熱帶去渡假嘆世界等等⋯⋯
本身Sago Mini是一個為2-5歲學前兒童設計的遊戲，而對認知障礙症來說，好適合畀中度至嚴重的老人家玩，絕對係一個可以激活大腦的遊戲app，訓練邏輯思考，也可算是另類的感官刺激。一app在手，包羅萬有。下載試用之後，係我唯一有付費購買嘅遊戲app。
認字App
認字、閱讀、發聲朗讀，保持腦部積極運用，這類鍛練腦筋練習，都有助保持記憶力。
只要隨意在App Store搜尋「認字」／「識字」就有很多認字app可以下載。
讀新聞、天氣預報
閱讀可以保持記憶力之餘，朗讀可以保持說話和吞嚥能力良好。除左識字卡之外，在平板電腦閱讀新聞、天氣報告，可以節省列印紙張更環保，如果字體太小，也可以用手指隨意拉大。朗讀天氣預報，讀日子、時間、氣溫，可以畀阿媽知道今日係何年何月何日，亦可以知冷暖，是不錯是現實導向練習。
背唐詩
除左讀新聞、天氣預報，亦開始教阿媽背唐詩。點解會揀背唐詩？因為唐詩有節奏感，琅琅上口，訓練說話吞嚥有幫助，而且唐詩有豐富的畫面，可以增加大腦的想像力。背誦加強記憶力，本身以為阿媽背唔到唐詩，但一日背一點，依家即使隔日再問，佢都可以背得出來。
大腦需要每天練習，才能保持精靈敏捷。以上分享左不同的遊戲和方法，只要願意努力，還是可以一點點進步呢！
