依家除左喺阿媽個囡、屋企嘅細妹，依家仲由女朋友變成太太，建立另一個家庭。回想起嚟，結婚？真係無諗過會結，亦都冇諗過媽媽會見證到呢一日，好開心！
以前細個好想拍拖，偏偏好想果時就無拖拍。到後來明白對好多人理所當然嘅事，對我來講唔係必然嘅時候，想法就唔同左。有，就自然會來吧！冇，亦唔會特登去搵，我唔想，亦冇多餘嘅力氣去嗌交，人生好累。家人患病，作為照顧者，已經學會自己問題自己解決，不想麻煩到任何人。如果出奇蛋一次可以滿足三個願望，我只要一個就好：只想每一日過得輕鬆一啲，已經心滿意足。
以前有人問過我，覺得單數好啲，定係雙數好啲？其實單、雙數都無所謂，都係咁過。無論一個人，抑或兩個人都可以過得好好，都可以完成很多事情，但遇到佢之後，我呢個想法有少少唔同咗。
那時候在院舍，沒有工人姐姐幫忙，什麼都要親力親為，一去便是半日。開始果陣，每個星期得我一對手、分幾次搬尿片上院舍，到後來兩對手一齊搬。一齊去應付我媽嘅「師傅到」，幫忙夾計氹我媽，後來比我還有耐性。
我問佢：「你唔覺得成日陪我上院舍係浪費緊你時間？放假你就休息下，唔洗好似我咁打兩份工」
佢話：「一齊咪即係陪緊你囉！」
起初真係好擔心自己會拖累佢，亦好擔心唔知其他人會點樣睇，知自己背景特殊唔會有咩奢求。咁大個人有些事、有些眼光就要學會忍耐。如果唔係一早遇到佢，我諗自己連拍拖都唔敢。自己辛苦就好啦，無謂拖累人嘛！返工仲唔夠chur咩？仲要handle埋我。反正，我也習慣遇到問題自己解決。原來，戀愛和照顧者這兩個名詞，並不一定是對立的。有人陪伴，有人可以呻下，一齊去打邊爐食米線、睇場戲，隨便到處走走，讓心情悠閒一下，感覺係會好好多。
當我精神情緒唔好，佢得閒又提醒下我，唔好將自己拉得太緊、照顧別人之前要照顧自己。當我覺得呢幾年除左照顧，睇住身邊的人為理想或末來努力付出，再睇自己唔知做緊乜，好廢，好冇用。佢叫我點忙都要留返一啲時間畀自己，搵啲嘢學下啦。於是手殘嘅我膽粗粗報左車衣班，每課短短幾小時，咩都唔可以諗，只可以專注學習做一件事：點樣車好眼前件衫。原來搵返屬於自己嘅小小時間、空間咁重要。
佢，就係果時嘅男朋友，依家嘅老公。好多謝一直以來的陪伴、支持和愛護，走到今日。這是我的幸運。
