上一篇「牙痛慘過大病」提到刷牙唔屬於院舍住宿必須提供嘅服務，因為咁我媽啲牙爛得好快。咁之後我帶我媽睇過唔同醫生同牙醫…… 要搵到個願意睇有心臟問題＋中過風＋認知障礙既牙醫一啲都唔容易。
內科醫生
由於我媽本身中過風，食開薄血丸，有抗凝血功能，常理都知唔可以貿貿然剝牙。喺政府老人科覆診，我媽唔識表達，我就同內科醫生講我媽牙齒潰爛嘅情況。
我：「醫生，我媽話啲牙好痛」
醫生全神貫注望電腦打字。
我：「佢有好多爛牙……」
我：「但係呢，佢食緊薄血丸。」
醫生：「咁樣好難止血」
繼續打字印藥單。
我：「佢牙真係好痛…… 其實果隻藥可唔可以停一停，去剝牙。」
諗左一陣，醫生：「考慮病人身體情況，停藥會令病人有性命危險，唔可以停藥。」
如是者，我問左個醫生幾次，佢都係唔建議停藥剝牙。可能係我講得唔清楚而醫生好忙，其實我係想叫醫生俾advice停藥安排去剝牙，唔係完全停藥。我果時又唔醒目，應該叫醫生立即轉介我媽去政府牙科度睇嘛……於是我就開始用自己既方法搵牙醫。
1. 政府牙醫
之後我媽keep住牙痛，於是我預約左政府牙科診所。政府牙科要提早一個月book，先有得睇症！睇症果日終於到，政府牙醫一見到我媽啲牙
牙醫：「有冇長期病患？」
我：「我媽中過風，食緊薄血丸」
牙醫：「醫生有冇建議可以停藥？」
我：「冇啊」
果日遇著我媽「師傅到」，情緒有少少高漲，係咁重覆同牙醫講「啲牙好痛」，係咁問牙醫「係唔係剝牙啊」咁樣。之後，個牙醫都無幫我媽檢查，就話：「咁樣剝唔到牙，用防敏感牙膏返去刷下，另外用埋牙縫刷同漱口水，睇下情況有冇改善。」
我：「但係佢住老人院，冇人幫手早晚刷牙，而我鐘點工人只係下午上去……」
牙醫：「咁樣無辦法喎」
我拎左兩支試用裝牙膏，無奈咁推住我媽離開診所。等左成個月睇牙醫，換來「無辦法喎」真心吹漲。就算有中風、心臟問題同認知障礙既老人家，都會好似一般人咁牙痛，牙痛難當就需要剝牙，唔剝就食唔安瞓唔落，影響情緒。牙痛係因為有蛀牙，而點解會蛀牙，正正係無辦法維持口腔清潔衛生，做唔到早晚基本刷牙啊嘛！咁你叫一個住老人院行動不便、無意識既老人家去早晚刷牙，係解決唔到牙痛問題喎！
2. 私家診所牙醫
無理由無牙醫可以幫忙。於是，我帶我媽去一間我去過既牙醫診所。喺預約既時候，姑娘已經講明，我媽既情況未必可以喺佢地診所剝牙，最後只可能俾錢諮詢一下。
今次呢個牙醫，檢查完我媽既牙齒，單刀直入：「全部牙都差唔多蛀晒，唔剝牙會一直痛，可能今日係左邊痛、聽日係右邊痛」
牙醫清楚我媽既狀況之後，我媽既心臟問題其實唔係無得搞，之前睇過類似既病人，可以寫信去公立醫院內科問下停藥安排。而診所設備冇醫院咁好，牙醫建議不如直接去私家醫院既牙科門診，搵邊個醫生。時間、金錢就係用左喺度，唯有同自己講，而家起碼有個方向，知道下一步可以做咩。
後記：原來耆智園有為需要牙科服務既認知障礙長者提供相關資訊，大家如果有需要可以搵佢地幫手。而上一篇文章出左之後，亦有網友inbox分享帶住院老人睇牙經歷，又介紹專睇老人、有耐性、細心既牙醫俾我，原來大家都在尋尋覓覓，真係好多謝大家！
3. 私家醫院牙科門診
終於約到期睇私家既牙科門診，檢查完，牙醫知道左我媽身體情況之後，建議我地去返公立醫院既牙科，個度比較可以處理複雜既個案。咁我就同返牙醫講之前睇其他牙醫既經過，佢就話可以幫我地寫信去公立醫院內科，建議內科醫生轉介我地去公立牙科，轉介唔到就advice停藥安排。
然後，再等多一個多月，牙醫收到公院內科醫生既回信，原來我媽既情況，剝牙前停一日藥就搞店，就係咁簡單。剝牙一個少少既要求，兜左幾圈先搵到條路。唔緊要啦，搵到就好了。
而呢個牙醫明白我媽有認知障礙，有時係會不停重覆問佢問題，佢次次都耐心咁回答，講笑咁話我媽而家十足一個活潑好奇既細路仔咁。係囉！人到咁上下可能就會返老還童。
我媽而家冇再日日話牙痛喇！太好了！
今次學到野，唔好期望每個牙醫知道認知障礙既長者唔會有意識去刷牙，同埋佢地住喺院舍生活係無自由，長者唔係想去邊就去邊，刷牙之常人咁普通既事，佢地隨時做唔到。
另外就係，醫生事醫生了。病人講咩都冇用，有咩唔舒服，請醫生轉介或者協調最好。又長知識了！
