呢排真係好熱啊，出街行一陣就熱到底褲都濕埋。炎炎夏天，唔單止我哋要注意私密部位嘅衛生，包尿片嘅老人家更加注意下體嘅清潔，保持乾爽。Pat pat紅腫、潰爛、痕癢，手尾可以好長啊！
因為大小二便長時間接觸到皮膚，皮膚受排泄物刺激令pat pat出現紅腫、潰爛，台灣叫失禁性皮膚炎，而香港會歸納做接觸性皮膚炎，皮膚情況未差到成為襑瘡，簡單啲可以叫做尿疹。係架，老人家同BB仔一樣，「鴨」得耐尿片就會生尿疹。
尿疹護理有四個重點：1乾爽＋2清潔＋3保濕＋4隔離。
第一步：揀透氣成人紙尿片，保持乾爽
隨著天氣轉變，冬夏兩季，使用嘅尿片會有不同。尿布密閉不透氣，尿片內潮濕悶熱，呢啲都係導致pat pat發炎紅腫嘅原因。冬天冇夏天咁潮濕悶熱，所以冬天可以用普通嘅紙尿片，只要定期更換就可以。但夏天炎熱潮濕，勤力更換之餘，更要轉用透氣度高嘅尿片。唔怕揀貴少少，最緊要通爽透氣，尤其住院舍嘅老人家，痾一篤尿可能要等幾個鐘先有人換，紙尿片唔透氣，焗住會好辛苦。
一分錢一分貨，消委會做左成人尿片測試，可以睇下邊款性價比高先買。參考：
成人紙尿片/褲質量參差透氣及乾爽程度有待改善（消費者委員會）
成人紙尿片大激鬥誰是「尿片王」？（香港經濟日報）
同場加映：點樣換尿片？拍得幾清晰易明，仲糾正左我一啲唔好嘅手勢。
第二步：清潔
清潔pat pat唔係用濕紙巾抺乾淨就得，在去除排泄物之後，要用免沖洗嘅皮膚清潔劑，徹底清潔大小便才能減少對皮膚嘅刺激。方法係：將清潔泡沫噴在濕紙巾上，輕抺pat pat皮膚，之後等乾不需再用水洗。清潔過程唔好太用力，向同一方向抺，唔好來回拭擦。大家可以就個人喜好買唔同嘅牌子。
第三步：保濕
清潔皮膚後，可以用有保護成份嘅護膚膏。如果情況輕微，可以用凡士林，真係好萬用！如果已經有紅腫，就要含有鋅成份嘅護膚膏。有以下呢幾款。
第四步：隔離
最後就係做好隔離，避免大小便刺激皮膚。而家一般含鋅護膚膏都添加左隔離成份，情況只得紅腫，保持pat pat 乾爽透氣，做好清潔保濕就好快好返。不過，如果pat pat皮膚已經出現破損，要改用清水輕壓，再使用無痛噴式保膚膜或保護液，作為隔離，防止再受到感染。
老人家失禁，家人最好要搵原因對症下藥。如果老人家可以透過鍛鍊唔用尿片，最好就唔用。唔用尿片老人家除左有返自尊自信，同時失禁帶來嘅紅腫、痕癢、破損通通消失。
如果到左逼不得已使用尿片，就要勤力換，注意清潔衛生。成日臥床的老人家就要時不時側身，避免生襑瘡。
而住院舍的有局限，幾個鐘換一次片⋯⋯ 所以就算老人家住院舍，都要定時定候幫佢檢查下pat pat，唔可以假手於人，否則發現果陣將會好嚴重。我媽都有尿疹問題，洗pat pat 可以話係我每次上院舍指定動作。我細個果陣阿媽點樣幫我，我就點樣幫返佢。以上純粹經驗分享，得院友家人介紹，用左清潔泡泡和潤膚膏係可以減少皮膚紅腫、痕癢發炎，而家控制得幾好，唔洗受再皮肉之苦喇～
P.S. 以上我冇隻隻牌子用過，歡迎大家話我知邊啲又平又好用！
