最近，收到社署嘅「院舍券」邀請信，邀請我地申請第二階段「長者院舍住宿照顧服務券試驗計劃」。今次我想從用家角度去思考一下，究竟申唔申請「院舍券」好？
乜野係「院舍券」？
簡單嚟講，就係政府拎左8億出嚟，為身體已經評估為「中度缺損」並在「中央輪候冊」排緊隊住政府宿位嘅老人家，可以快啲拎到資助，讓佢地可以拎到可能比「綜援」（約$7000）多嘅資源住院舍。難聽啲嚟講，就係政府藉此減少「中央輪候冊」上排隊排到仙逝都未上到院舍嘅老人家，縮短等候政府院舍宿位嘅長長人龍，並透過資產審查，令本來由政府「全包」嘅安老照顧變成部分開支由家屬承擔。另外，雖然有８億，但係冇放錢去改善社區安老照顧服務。
1. 政府資助 VS 部分開支由家人承擔
一齊睇睇現有各項津助：
如果有經濟困難嘅老人家，入住院舍時可以申請綜援，
- 普通院舍綜援 $4,875
- 院舍綜援+普通傷殘津貼 $5,515
- 院舍綜援+高額普通傷殘津貼 $7,025
一般老人家到左65歲或以上，可以領公共福利金：
- 高齡津貼(生果金) (65至69歲) [需經資產審查，不可以同時領取綜援] $1,180
- 高齡津貼(生果金) (70歲或以上) [不可以同時領取綜援] $1,180
- 長者生活津貼 [65歲或以上，需經資產審查，不可以同時領取生果金/傷殘津貼或綜援] $2,285
再睇睇「院舍券」津貼多少？
從上圖可以見到，「院舍券」會根據老人家嘅入息，分左八個級別。如果唔同意接受經濟審查，只可以獲得級別7嘅資助，按今年計算會獲得$3,152；而本身拎緊住舍綜援嘅老人家，就可以獲得全數$12,609。
對比現有嘅資助，一般長者拎生果金$1,180或者長者生活津貼 $2,285，就算拎「院舍券」級別7嘅資助，都會比生果金／長者生活津貼多少少，但要注意「院舍券」同綜援或高額傷殘津貼 係唔可以同時申請；另外，本身拎院舍綜援長者可以拎到 $7,025，「院舍券」無疑係資助多左，唔洗再焗住$7,000零蚊好差嘅院舍，或者可以講屋企人嘅補貼可以減輕一啲。
大家唔好以為$7,000零蚊好差嘅院舍指「劍橋」果啲，院舍級別分為護理安老院（主要服務嚴重缺損為主嘅老人，多數由政府資助，透過中央輪候冊入住）、護養院（服務嚴重至中度缺損／能自理老人，多數由政府資助，透過中央輪候冊入住；亦有私營，我媽住緊呢類院舍，$12,000-$20,000一個月，視乎缺損程度），其他私營院舍分四等：甲一、甲二、乙一、乙二。「劍橋」其實屬於政府認可買位既「甲一」組別，每月院費大約$7,500（床位無窗）至 $9,500（床位有窗單邊）未包雜費、冷氣費，包三餐一宿。所以就算拎院舍綜援，屋企人其實要包底1-2千蚊。如果以$7,000院費比較，「劍橋」果啲屬於比較「好」嘅院舍，乙一、乙二果啲院舍$7000全包，慘不忍睹，你又敢唔敢住？
乍看「院舍券」好似好著數咁喎，真唔真？
2. 退出中央輪候冊（包括院舍照顧及社區照顧服務兩條隊）
當然係「無咁大隻蛤乸隨街跳」啦！
「院舍券」有半年試用期，申請並使用嘅呢半年，中央輪候冊上的排名唔會向前，而半年之後，如果接受「院舍券」，就要退出中央輪候冊，包括院舍同社區照顧兩條隊。中央輪候冊上的院舍，資源充足，質素好好，通常最快要等36個月，視乎想入那間院舍有冇位，最長可以等好幾年，甚至等到老人家仙遊都未等到，所以等中央輪候冊要「鬥長命」，當入到政府院舍家人唔洗負擔院費，質素好老人家安享晚年。
如果退出左中央輪候冊，無政府院舍嘅監管同大水喉射住，院舍質素好唔好屋企人要把關，所謂「錢跟人走」，完全視乎市場上有什麼院舍可以選擇，私營院舍有時唔係出左幾多錢，就有拎得返幾多野。而計劃只包括「中度缺損」老人家，萬一老人家健康惡化成「嚴重缺損」要重新在中央輪候冊排隊，未輪候到位嘅時候，雖然可以用院舍券住住先，院舍唔可以因為老人家嚴重左而趕老人家走，但要知道，照顧嚴重缺損老人嘅護理安老院與照顧中度缺損嘅護養院，人手排制差好遠。
另外，老人家如果用「院舍券」住左超過半年院舍，身體情況好轉想回家住，唔好意思喇，中央輪候冊上社區照顧服務取消左，幫你唔到，出到社區樣樣野都要自己比。除非你好有錢，一旦用「院舍券」就代表之後一直要住院舍，直至百年歸老。
3. 搵位
雖然試驗計劃由第一階段21間院舍增加到第二階段既67間院舍可供選擇，但係可以使用「院舍券」嘅床位數目，唔代表床位空置數目，即係咩意思？例如，你睇中左某區比較好既院舍可申請「院舍券」，明明列表上有好多床位可以申請，但係打電話去問才發現全院已滿。
同時，搵院舍除左質素好唔好之外，「院舍券」最多資助「級別0」$12,690，如果需要特別照顧，例如從「中度缺損」變成「嚴重缺損」，院費價錢會比「級別0」資助額高，要注意埋間院舍有冇提供相應床位，如果冇，又要「錢跟人走」搬去支援「嚴重缺損」院舍，都幾頻僕下。
結論係，申請唔申請院舍券，要睇老人家意願，暫時住住先，定係長住。申請，無得返社區住屋企、老人家身體唔好有大變化，嚴重左又要排返中央輪候冊。唔申請，就「鬥長命」總有一日等到。記住老人家身體狀況只會一直走下坡，申唔申請睇下想先甜後苦，抑或先苦後甜。
其他參考：「選擇院舍秘笈」（香港中文大學那打素護理學院，流金頌培訓計劃，社區及院舍的老人照顧公眾講座）
