香港人去到邊都要排隊，搭車要排隊、食飯要排隊、俾錢要排隊、申請居屋要排隊、睇醫生梗係要排隊啦。
公立醫院專科覆診大堂人頭湧湧是常事，從以前冇輪椅等候區，到而家輪椅太多有時泊唔落；從以前等一個鐘，到而家等最少等兩個鐘；從以前五個月覆一次診，到而家九個月或一年覆一次。每一次覆診見醫生，由入房門到行返出房門只係得幾分鐘。
我媽已經唔係好表達到自己個感覺，短期記憶等於咩都唔記得。
通常醫護非常忙碌，無停手，醫生問左有冇咩特別情況，如果沒有，就會印返上次份藥單，出去約期拎藥。
自己陪診
心入面明白醫生係真心想幫助病患的，但睇睇外面等候嘅人何其多，無可奈何啊⋯⋯每一次覆診，盡量自己陪診，始終醫生每一次覆診都唔同人，未必清楚病史；陪診員亦唔會太清楚我媽平日狀況，未必可以在見醫生嘅短短幾分鐘入面，同醫生提及遇到嘅問題。不過陪診真係要花好多時間在等候上，排隊覆診兩個鐘、拎藥通常輪候大半個鐘到一個鐘，覆一次診連埋來回交通，前後四至五個鐘走唔甩，請半日假時間其實掹掹緊。等候嘅時間好長，等緊無聊，幫阿媽按摩一下，當成係一個唔錯嘅相處時光。
見醫生
前幾日覆診，我以為好似平日咁樣例行公事，排隊等候、諗定一陣要講咩、入到房、講、然後出返黎。但係遇到一個細心問診嘅醫生，仔細問、仔細觀察，見佢流少少口水問我媽係咪有吞嚥困難，我話係，見緊言語治療師；又問活動能力各樣，將不必要的藥物除去，檢查報告發現血液樣本有一個不合格⋯⋯果一刻，我好感動，好耐都無見到一個咁有heart嘅醫生，好耐未試過覆診覆得咁輕鬆，唔洗一入醫生房就開始問答比賽。醫生同病人嘅關係，就只係咁單純而美好。問到有一刻，我有啲擔心醫生，你咁仔細，咁你今晚幾點先可以做完啲野啊？真係好多謝你啊！
回歸基本步，其實醫生能夠有多點時間去察覺病人有咩問題，病人才得到適切醫治。當以前冇輪椅等候區，到而家很多老人家坐輪椅；當以前覆診等候一個鐘，到而家等最少等兩個鐘；當以前五個月覆一次診，到而家一年覆一次。當而家每一次覆診見醫生只係得幾分鐘，以後人口老化更厲害，咁第日係咪要醫生睇一睇、改一改、印一印，就計完成左一個病人⋯⋯？
