我問：「啲嘢好唔好食架？」
阿媽有時點頭，有時搖頭 。好又一餐唔好又一餐，佢會將一餐好好完成。
因不同的疾病，例如中風、認知障礙症、癌症、老化、手術，會有唔同程度吞嚥咀嚼障礙，正常食物質地可能變得太硬，需要改食軟飯軟餸。我媽也有吞嚥困難，經過言語治療師診治，情況已經大大改善。佢而家唔食蛋，所以每餐軟餸都是蒸龍俐魚柳。我媽食飯，總係望我或者周圍望，佢好少望住有咩餸，然後用匙一大匙一大匙送入口。起初我以為好食，一聞，嘩！原來一大匙一大匙食唔係津津有味，只係填飽個肚。
睇《大人》雜誌，認識到日本因應高齡化，推出左「介護食」俾一啲有吞嚥或咀嚼困難的人，食物質地變稔變軟，但唔影響食物色香味，食得滋味。（非打手，呢本雜誌介紹實用照顧資訊，好雜誌值得推介）我錯過左試食會，諗住去社企買，點知社企都冇賣了。平日除左帶湯，帶點心（點心唔係樣樣食到），都想帶下其他食物，有返少少吃的樂趣，呢個會係個唔錯選擇。
於是自己搵下資料，「日本農林水產省」已經把不同程度吞嚥障礙分類，為「介護食」制定 “Smile Care Food” 標籤。第一類係藍色標籤，呢類食物比可以正常飲食但營養攝取不足嘅人。第二類係黃色標籤，細分幾類包括「容易咬爛的食物」、「可以用牙齦咬爛的食物」、「可以用舌頭壓爛的食物」，同埋「不需要咬的食物」。第三類就係紅色標籤，含有豐富營養的泥狀食物、慕絲狀食物，同埋啫哩狀食物。
參考資料：
日本農林水產省Smile Care Food Label介紹 （英文版本）
官網還提供產品一覽：藍色標籤、黃色標籤、紅色標籤
而「日本介護食品協議会」（Japan Care Food Conference）則將介護食主要分為四個類別（区分）：「容易咬爛的食物」、「可以用牙齦咬爛的食物」、「可以用舌頭壓爛的食物」，同埋「不需要咬的食物」。約定俗成，大部分製作「介護食」的商戶，是根據「日本介護食品協議会」制定的指引分類，比較簡單清晰。
日本介護食品協議会將介護食主要分為四個類別：「容易咬爛的食物」、「可以用牙齦咬爛的食物」、「可以用舌頭壓爛的食物」，同埋「不需要咬的食物」。（按圖放大）
有左標籤就容易買喇！我媽應該屬於黃色標籤，一於訂返黎試下！
啊⋯⋯ 唔覺唔覺入左好多貨，有時間做試食報告比大家睇啦！除了買現成介護食，還可以在家製作。食得知味，食物勾起嘅回憶，不單單在咀嚼，亦在細味人生。
如果大家有興趣想試，可以去商店睇下啊！
延伸閱讀：
介護食開箱！試食南瓜湯、忌廉燉雞肉、咖哩烏冬麵、三文魚雜菜飯
